1. Public Health
  2. Kab Mob Coronavirus
  3. Ntaub Npog Ntsej Muag

Ntaub Npog Ntsej Muag

stack of masks or cloth face coveringsYuav tsum hnav daim ntaub npog ntsej muag rau Cheeb Tsam Dane thaum nyob hauv cov khw thiab tsev lag luam raws li cov kevcai no:

Raws li daim ntawv, cov neeg muaj tsib xyoos rov saud yuav tsum hnav daim ntaub npog ntsej muag uas npog lub qhov ntswg thiab qhov ncauj thaum nkag rau cov chaw ua tsis yog yus tsev, suav nrog tsev lag luam, chaw kho mob, tos hauv kab nraum zoov, thiab hauv tsheb thauj neeg lossis caij npav. Daim ntawv xaj no pib siv thaum Lub Xya Hli Ntuj Vas Thij 13, Xyoos 2020 thaum 8:00 teev sawv ntxov.

Muaj kev zam tshwjxeeb rau qee yam haujlwm xws li noj mov hauv khw noj mov, tab sis thaum lub sijhawm ntawv, yuavtsum nyob li 6 taw deb lwm tus txhua lub sijhawm. Qee tus neeg kuj raug zam yog tias lawv hnav tsis tau daim ntaub npog ntsej muag vim lawv muaj kev loj hlob ntawm lawv lub cev thiab hlwb uas txwv tsis pub lawv hnav ntaub npog ntsej muag.

Thov saib daim ntawv no yog koj xav paub ntxiv.

Kev Tswj Txoj Cai No

Peb Txoj Haujlwm

Peb tau tsim ib pab pawg los soj ntsuam cov kev tsis txaus siab los ntawm pej xeem thiab txiav txim siab cov kev zoo tshaj plaws los pab nrhiav kev kawm thiab kev pabcuam rau cov tib neeg thiab cov tsev lag luam uas tsis ua raws li txoj cai uas yuavtsum hnav daim ntaub npog ntsej muag. Lub hom phiaj ntawm pab pawg no yog yuavtsum nhriav kev kawm thiab kev pabcaum ua ntej quab yuam. Thaum tsim nyog lawm, yog hais tias cov tsev lag luam tsis ua raw cai thiab feem ntau cov tibneeg tuaj cov tsev lag luam tsis ua raws cai ces, tshwj xeeb yog tias muaj neeg coob nyob uake ib qhov chaw, cov tsev lag luam thiab neeg tuaj yuav raug them daim pib. Yog tias daim pib npluas raug xa tawm hauv los ntawm lub nroog Madison tus nqi yuav yog $376, yog tias tawm sab nraum Lub Nroog raws li cov chaw uas nyob hauv Cheeb Tsam Dane tus nqi pib yog $ 263.50.

Koj Tes Haujlwm

Yog hais tias koj pom tias ib tug neeg tsis hnav daim ntaub npog ntsej muag, tsis yog koj tes haujlwm nug lawv vim li cas lawv thiaj li tsis hnav daim npog ntsej muag. Nws tsis yog koj txoj haujlwm los cuam tshuam yog tias ib tug neeg tsis hnav daim ntaub npog ntsej muag. Qee tus neeg muaj cov xwm txheej lossis lawv lub cev thiab hlwb tsis pub lawv hnav tau daim ntaub npog ntsej muag. Koj txoj haujlwm yog hnav koj daim ntaub npog ntsej muag thiab nyob deb ntawm lwm tus xwb. Saib Ntu no yog koj xav paub txog qhov no ntxiv.

Vim Li Cas Hnav Daim Ntaub Npog Ntsej Muag Thiaj Tseem Ceeb Heev

Cov ntaub npog ntsej muag, pab tiv thaiv kev kis tus kab mob.

Kev Ntxub Ntxaug thiab Kev Tsis Ncaj Ncees Los Ntawm Thaum Hnav Daim Ntaub Npog Ntsej Muag

Tsis yog txhua tus yuav tsum tau hnav daim npog ntsej muag. Qee tus neeg xiam oob qhab, lub cev lossis lub hlwb, thiab cov hluas heev (hnub nyoog qis dua 5 xyoos) tsis tas yuav hnav daim ntaub npog ntsej muag vim hais tias ua li ntawd yuav tsim kev kub ntxhov thiab tsis zoo nyob rau tus neeg ntawv. Cov cai loj los ntawm Tseem Hwv hais tias cov tsev lag luam yuavtsum nhriav kev pabcuam rau cov neeg uas hnav tsis tau daim ntaub npog ntsej muag. Qhov no txhais tau tias yog muaj lwm txoj kev pabcuam (piv txwv li, khaws khoom lossis nqa khoom mus rau tus neeg yuav khoom) rau cov neeg no kom lawv thiaj siv tau cov tsev lag luam. Yog koj xav paub ntau ntxiv txog yam uas yuav tsum muaj nyob hauv Mekas Txoj Cai Pab Cov Neeg Xiam Oob Qhab thiab peb cov kevcai ntawm npog ntsej muag, thov saib Madison Chaw Haujlwm Pab Pej Xeem Tau Kev Ncaj Ncees (Madison Office of Civil Rights) qhov website.

Cov tib neeg hnav ntaub npog ntsej muag hnav pab tiv thaiv lawv tus kheej thiab lwm tus ntawm tus kab mob COVID-19. Yuavtsum xav tias ib tug neeg uas npog ntsej muag yog lawv npog tiv thaiv lawv tus kheej los ntawm COVID-19. Tsis txhob xav tias lawv npog ntsej muag kom zais lawv tus kheej, lawv ua txhaum cai, lossis xav tias lawv npog lawv ntsej muag vim lawv muaj tus kabmob COVID-19 thiab kis tau rau lwm tus. Cov tsev lag luam yuav tsum tsis txhob yuam neeg kom hle lawv daim ntaub npog ntsej muag ua ntej lawv nkag.

Yuav thiab Nhriav Daim Ntaub Npog Ntsej Muag Qhov Twg?

Tsim Ib Daim Rau Koj Tus Kheej

CDC muaj cov lus qhia rau kev tsim koj daim npog ntsej muag, nrog rau kev qhia xaws thiab yog koj tsis paub xaws yuav tsim daim npog ntsej muag li cas. Rau qhov kev qhia uas tsis-xaws, koj yuavtsum muaj ntaub, zoo li lub tsho qub, cov tsho rwb, lossis cov ntaub npog taub hau (bandana), cov hlua khi los sis cov hlua khi plaub hau, thiab txiab txiav.

Yuav Daim Ntaub Npog Ntsej Muag

Koj yuav tau cov ntaub npog ntsej muag hauv computer (online) thiab hauv cov khw muag khoom xws li Target. Saib hauv daim ntawv no cov neeg uas nyob ze uas muag ntaub npog ntsej muag (Thov nco ntsoov peb tsis kuaj cov npe no).

Mus Nqa Ntawm Koj Lub Zej Zog Cov Chaw Pabcuam

Coob tus neeg txawj xaws thiab tsim tau ntau cov ntaub npog ntsej muag rau sawvdaws siv hauv peb lub zej zog. Saib koj cov neeg nyob ze ib puag ncig hauv social media li facebook, ntawm cov neeg nyob ze koj, thiab lwm qhov chaw nyob uake hauv computer seb puas muaj neeg pub ntaub npog ntsej muag dawb rau zej zog. Peb kuj tseem ua haujlwm koom tes nrog cov koom haum pab zej zog los nhriav kev pabcuam kom txhua tus neeg tau ntaub npog ntsej muag yooj yim. Peb tseem yuav ntxiv rau daim ntawv no qhia pej xeem cov chaw mus nqa ntaub npog ntsej muag kom sai li sai tau thaum peb muaj tiav cov ntaub ntawv qhia. Hauv qab no muaj ob peb txoj kev xaiv tau ntaub npog ntsej muag:

  • Cov Tib Neeg: Mus saib hauv Cheeb Tsam Dane Cov Neeg uas Xaws Ntaub Npog Ntsej Muag yog koj xav tau ntaub npog ntsej muag. Yog koj xav pab xaws ntaub npog ntsej muag rau lwm tus sim lossis pab nyiaj rau lub koom haum no thov mus saib ntawm no.
  • Cov Koom Haum: Mus saib Cheeb Tsam Dane lub website yog koj xav thov ntaub npog ntsej muag rau koj lub koom haum

Kev Siv thiab Saib Xyuas Koj Daim Ntaub Npog Ntsej Muag

Thaum Hnav Daim Ntaub Npog Ntsej Muag

  • Ntxuav koj ob txhais tes ua ntej hnav daim ntaub npog ntsej muag
  • Yuavtsum hnav kom npog koj lub qhov ntswg thiab qhov ncauj thiab ua kom nruj rau hauv qab koj lub puab tsaig
  • Yuavtsum looj tau rau koj ob sab plhu ntawm koj lub ntsej muag
  • Hnav tau kom koj ua pa tau yooj yim

Thaum Hle Koj Daim Ntaub Npog Ntsej Muag

  • Rub cov hlua tom qab koj lub taub hau kom xoob los yog rub cov hluas ntawm koj ob lub pob ntseg kom xoob
  • Kov cov hlua tom qab lossis cov hluas ntawm koj ob lub pob ntseg xwb
  • Muab daim ntaub tais nyob sab nraud ua ke
  • Muab daim ntaub npog ntsej muag pov rau hauv lub tshuab ntxhua khaub ncaws (kawm ntxiv txog kev ntxuav cov ntaub npog ntsej muag)
  • Ceev faj tsis txhob kov koj lub qhov muag, qhov ntswg, thiab qhov ncauj thaum tshem daim ntaub npog ntsej muag thiab ntxuav tes tam sim tom qab tshem daim ntaub npog ntsej muag.

Ntxuav Koj Daim Ntaub Npog Ntsej Muag

Yuavtsum ntxuav daim ntaub npog ntsej muag tom qab txhua zaus siv. Nws yog ib qho tseem ceeb uas yuav tsum nco ntsoov cov theem thaum tshem daim ntaub npog ntsej muag kom zoo thiab ntxuav koj txhais tes tom qab koj kov daim ntaub npog ntsej muag.

  • Sim tshuab ntxhua khaub ncaws

    • Koj ntxhua daim ntaub npog ntsej muag nrog koj cov khaub ncaws li koj niaj zaus los tau.
    • Siv cov xab npus ntxhua khaub ncaws thiab cov dej sov tsim nyog rau daim ntaub npog ntsej muag.

 

  • Ntxhua Ntawm Tes

    • Npaj cov tshuaj ua kom dawb (bleach) tov:

      • 5 diav (1/3 khob) tshuaj dawb nrog rau ib nkas loos dej sov lossis
      • 4 diav tshuaj dawb rau hauv ib quart dej sov
    • Saib daim ntawv qhia ntawm cov tshuaj dawb lub poom saib seb koj cov tshuaj dawb puas zoo rau kev tua kab mob. Qee cov tshuaj ua kom dawb, xws li cov tshuaj ntxhua cov khaub ncaws muaj xim tsis muaj cov tshuaj tua kab mob. Saib zoo seb cov tshuaj dawb puas tau dhau hnub tas sij hawm. Tsis txhob tov cov tshuaj daw nrog ammonia lossis lwm yam tshuaj ntxuav kom huv.
    • Muab daim ntaub npog ntsej muag tso rau hauv cov tshuaj dawb rau 5 nas this.
    • Yaug kom huv si nrog dej txias los yog dej sov.

 

  • Ua kom qhuav hauv lub tshuab ziab khaub ncaws. Siv qhov kev xaiv kom kub tshaj plaws thiab saib zoo kom daim ntaub ziab qhuav thaum ziab hauv lub tshuab ziab khaub ncaws.
  • Ua kom qhuav los ntawm cua. Muab daim ntaub npog ntsej muag tso tiaj tus thiab cia kom qhuav huvsi. Yog tias ua tau, muab daim ntaub npog ntsej muag tso rau hauv tshav ntuj ncaj qha.

Tsev Lag Luam thiab Chaw Ua Haujlwm Khoom Siv

Yuav Tham Lus Li Cas Rau Cov Neeg Yuav Khoom Txog Txoj Cai No

Txhua tus neeg muaj peev xwm yuav tsum hnav daim ntaub npog ntsej muag yog lawv tuaj rau hauv koj lub tsev lag luam. Yog tias ib tug neeg nkag rau hauv tsev lag luam es tsis hnav daim ntaub npog ntsej muag, thov qhia lawv txog txoj cai. Yog tias lawv hais tias lawv hnav tsis tau daim ntaub npog ntsej muag, koj yuav tsum tsim ib txoj kev pabcuam uas tsim nyog rau lawv, xws li tsim cov kev pab nraum zoov (curbside) lossis kev pabcuam xa neeg nqa rau lawv. Yog tias tus neeg ntawv tsis kam txais cov kev pabcuam ces, tus tswv lag luam yeej txwv tau tsis pub lawv nkag mus rau hauv tsev lag luam. Yog tias cov tsev lag luam tsis muaj lwm txoj kev pabcuam rau tus neeg muaj mob lossis xiam oob khab (xws li, cov chaw khiav ua si (gym)), lawv yuav tsum pub tus neeg nkag mus. Tus neeg ntawv yuav tsum ua raws li lwm cov kev qhia txwv, xws li nyob nrug deb lwm tus. Yog hais tias ib tug neeg tsuas tsis kam hnav daim ntaub npog ntsej muag, koj uas yog tus tswv lag luam yeej muaj cai kom lawv tawm mus. Yog koj xav paub ntxiv txog yam uas yuav tsum muaj nyob hauv Mekas Txoj Cai Pab Neeg Xiam Oob Qhab thiab peb cov cai npog ntsej muag, thov saib Madison Chaw Haujlwm Pab Pej Xeem Kev Ncaj Ncees qhov website.

Qee cov tswv yim los pab cov tsev lag luam tham txog daim ntaub npog rau cov neeg tuaj yuav khoom suav nrog rau:

  • Qhia lawv txog lwm yam kev pab, xws li kev khaws khoom nraum zoov (curbside) lossis nqa mus rau tus neeg (delivery), kom ua tau raws li cov neeg yuav khoom kev xav tau kom lawv thiaj tsis tuaj rau sab hauv koj lub tsev lag luam.
  • Yog tias ua tau, yuav los yog thov neeg muab cov ntaub npog ntsej muag rau koj pub dawb rau cov neeg tuaj ncig khoom uas tsis muaj ntaub npog ntsej muag.
  • Qhia meej rau ntawm koj lub lag luam qhov website thiab cov paib ntawm qhov rooj tias yuav tsum hnav ntaub npog ntsej muag ua ntej nkag koj lub lag luam.
  • Piav qhia tias tsab cai no yog thoob plaws hauv nroog thiab los ntawm Chaw Haujlwm Pej Xeem Kev Noj Qab Haus Huv pab txhawb rau kom tus kab mob COVID-19 tsis txhob kis ntxiv mus.

#MaskUpMadison #MaskUpDane

Lub #MaskUpMadison thiab #MaskUpDane koom haum yog ib qhov kev sib koom tes los txhawb hnav daim ntaub npog ntsej muag hauv peb lub zej zog. Cov neeg koom uake rau lub koom haum no yuav tso tawm cov duab thiab ntawv txog hnav ntaub npog ntsej muag rau qhov npe kos (hashtag) #MaskUp, ntxiv rau #MaskUpMadison, #MaskUpDane, lossis #MaskUpUW.

Peb xav txhawb neeg kom lawv qhia txog vim li cas kev npog ntsej muag yog qhov tseem ceeb rau lawv thiab lawv yuav ua li cas thiaj pab rau lawv tus cwj pwm txog yuavtsum hnav ntaub npog ntsej muag. Cov neeg hais lus Mev thov siv cov npe kos (hashtags) # PonteLaMáscaraMadison, # PonteLaMáscaraDane, thiab # PonteLaMáscaraUW.

Ua tsaug ntau rau cov tsev lag luam nram no uas tau koom nrog peb:

  • Access Community Health Centers
  • Boys & Girls Club of Dane County
  • Centro Hispano
  • City of Madison
  • County of Dane
  • Destination Madison
  • Foundation for Black Women’s Wellness
  • Group Health Cooperative of South Central Wisconsin
  • J.H. Findorff & Son Inc.
  • Latino Consortium for Action
  • Latino Health Council
  • Metcalfe’s Market
  • Public Health Madison & Dane County
  • Rebalanced-Life Wellness Association
  • South Central Federation of Labor, AFL-CIO
  • SSM Health
  • United Way of Dane County
  • UnityPoint Health -- Meriter
  • University of Wisconsin-Madison
  • UW Health
  • Voces de la Frontera-Madison
  • Wisconsin Faith Voices for Justice
  • Wisconsin State AFL-CIO
  • Worker Justice Wisconsin

Cov Lus Nquag Nug

Peb yuav txuas ntxiv rau cov lug nquag nug no thaum muaj lus nug tshiab tawm tuaj.

Yuav ntev npaum li cas kuv thiaj yuav tsum tau hnav daim ntaub npog ntsej muag?
Koj yuav tsum hnav daim ntaub npog ntsej muag ntev raws li lub sijhawm koj nyob hauv cov tsev lag luam thiab thaum twg koj nyob ib qhov chaw sab hauv uas nrog cov neeg koj tsis nyob nrog. Koj tseem yuav tau hnav daim ntaub npog ntsej muag yog tias koj nyob sab nraum zoov thaum tos hauv kab kom nkag mus rau hauv ib lub tsev lag luam. Peb kuj pom zoo tias thaum lub sijhawm koj nyob nraum zoov uas koj nyob tsis tau nrug deb ntawm lwm tus vim muaj neeg coob heev, thaum ntawv kom yuavtsum hnav daim ntaub npog ntsej muag. Nco ntsoov tias, thaum nrog lwm tus nyob sib sau ua ke, yuav tsum nyob nrug deb lwm tus.

Kuv puas yuav tsum tau hnav daim ntaub npog ntsej muag thaum nyob sab hauv tsev txawm tias kuv nyob tau nrug deb lwm tus txhua lub sijhawm?
Txawm yog tias koj nyob tau nrug deb lwm tus txhua lub sijhawm thaum nyob ib qhov chaw sab hauv los koj yuavtsum hnav daim ntaub npog ntsej muag txhua lub sijhawm uas koj nyob nrog lwm tus neeg uas tsis nyob hauv koj ib tsev.

Puas yog kuv yuav tsum tau hnav daim ntaub npog ntsej muag thaum kuv siv kev pabcuam thauj neeg, tsheb ntiav lossis tsheb npav?
Yog lawm, koj yuav tsum tau hnav daim ntaub npog ntsej muag thaum caij tsheb thauj neeg, tsheb tavxij, tsheb ntiav, tsheb sib koom caij, lossis lwm yam rau kev ntiav tsheb.

Puas yog cov tib neeg uas twb tau kuaj pom tias lawv tau tus kabmob COVID-19 tseem yuav tau hnav daim ntaub npog ntsej muag?
Yog lawm.

 

Thaum twgkoj thiaj tsis tau hnav daim ntaub npog ntsej muag?
Koj tsis tas yuav hnav thaum:

  • Hauv tsev, thaum koj tsis muaj qhua
  • Yog tias koj nyob hauv qhov chaw ua haujlwm nrog lub qhov rooj kaw uas tsis muaj leej twg nkag tau mus hauv qhov chaw

Peb pom zoo kom hnav daim ntaub npog ntsej muag thaum koj nyob sab nraum zoov thiab koj nyob tsis tau nrug deb lwm tus li rau taw. Ib lub tswv yim zoo yog tias koj npaj daim ntaub npog ntsej muag nrog koj txhua lub sijhawm, yog tias koj nyob ib qhov chaw uas koj nyob tsis tau nrug deb lwm tus koj thiaj tau hnav npog koj lub ntsej muag.

Kuv puas yuav tsum tau hnav daim ntaub npog ntsej muag thaum kuv mus cuav zos tom lwm tus lub tsev?
Yog lawm, yog tias koj yuav mus hauv lawv lub tsev. Peb pom zoo kom hnav daim ntaub npog ntsej muag yog tias koj sib sau sab nraud thiab nyob tsis tau nrug deb lwm tus uas tsis nyob koj ib tsev. Nco ntsoov, tias thaum sib sau ua ke nrog lwm tus, yuav tsum nyob sib nrug deb.

Kuv puas yuav tsum tau hnav daim ntaub npog ntsej muag thaum taug kev nrog tus dev, lossis khiav nraum zoov, thiab lwm yam.
Qhov kevcai no tsis yuam neeg hnav daim ntaub npog ntsej muag thaum nyob nraum zoov yog tias koj tsis nyob hauv txoj kab tos nrog lwm tus neeg. Tabsis yog ib qhov zoo yog koj nqa nrog koj daim ntaub npog ntsej muag yog tias muaj ib lub sijhawm uas koj yuav tau npog koj lub ntsej muag, xws li yog tias muaj ib qhov xwm txheej li yog tias koj tus dev daim hlab khi tau sib txuas nrog lwm tus neeg tus dev lossis thaum koj khiav nraum zoov koj tau ntsib ib tug neeg nyob ze koj es neb tau sib tham.

Puas yog kuv tus tswv ntiav haujlwm yuav tsum tau muaj ib daim ntaub npog ntsej muag rau kuv sim yog tias lawv xav kom kuv hnav daim ntaub npog ntsej muag thaum ua haujlwm?
Yog lawm. Saib peb qhov chaw ua haujlwm cov cai yog koj xav tau cov ntaub ntawv ntxiv.

Kuv hnav tsis tau daim ntaub npog ntsej muag vim kuv muaj mob, mob hlwb, lossis xiam oob khab. Kuv puas yuav tau ntaub ntawv ua pov thawj qhia vim li cas kuv thiaj hnav tsis tau daim ntaub npog ntsej muag?
Koj tsis tas yuav tau ntawv ua pov thawj qhia.

Cov iav npog ntsej muag puas yog suav tias yog daim npog ntsej muag?
Tsis yog. Raws li Lub Chaw Haujlwm Pab Tiv Thaiv Kab Mob (CDC), kev sojntsuam tsis qhia zoo tias daim iav npog ntsej muag yog ib qhov zoo tiv thaiv neeg los ntawm cov tsos dej me me uas los ntawm neeg qhov ncauj thaum lawv ua pa. CDC tsis pom zoo siv cov iav npog ntsej muag rau hnav ua haujlwm txhua hnub lossis los hloov daim ntaub npog ntsej muag.

Kuv puas hnav tau daim npog ntsej muag uas muaj lub qhov ntxig?
Daim npog ntsej muag uas muaj lub qhov ntxig yeej hnav tau raws li txoj cai vim nws npog koj lub qhov ntswg thiab qhov ncauj. Tabsis, peb pom zoo kom tsis txhob siv hom npog ntsej muag no vim hais tias koj cov tsos dej me me nkag tau rau sab nraud. Qhov zoo tshaj yog koj hnav daim ntaub npog ntsej muag xwb, los yog tias koj hnav daim npog ntsej muag uas muaj qhov ntxig, koj yuavtsum hnav daim ntaub npog ntsej muag saum toj daim npog ntsej muag uas muaj qhov ntxig.

Thaum kuv hnav daim ntaub npog ntsej muag uas rau kuv daim iav pom kev pos huab. Kuv yuav ua li cas?
Mus saib ntawm no txog kev qhia pab.

Cov chaw sab hauv uas muaj phab ntsa qhib mus rau sab nraum zoov puas suav hais tias yog qhov chaw sab nraum zoov?
Tsis yog, cov chaw sab nraum yuav tsum qhib txhua sab tawm rau sab nraud. Qhib cov qhov rai tsis tsim ib qho chaw sab nraum zoov.

Puas yuav tsum tau hnav daim ntaub npog ntsej muag rau hauv chav ua exercise (gym) thiab cov chaw ua yoga?
Yog lawm. Tsuas pub zam tshwj xeeb yog hais tias: cov tib neeg muaj mob, muaj kev mob hlwb, lossis xiam oob qhab lawv thiaj hnav tsis tau daim ntaub npog ntsej muag.

Kuv puas yuav tsum hnav daim ntaub npog ntsej muag thaum da dej lossis hauv qhov chaw uasi luam dej cov dab luam dej?
Koj tsis tas yuav hnav thaum nyob hauv dej. Tabsis koj yuavtsum hnav thaum koj tab tom mus thiab los ntawm cov dab luam dej.

Kuv nyob hauv ib chav tsev lossis chav tsev nyob nrog ntau chav nyob. Kuv puas yuav tsum tau hnav daim ntaub npog ntsej muag hauv qhov chaw dav (chaw noj mov, chaw tos qhua, thiab lwm yam)?
Yog lawm. Txoj Cai xaj kom koj hnav daim ntaub npog ntsej muag thaum nyob cov chaw sab hauv uas muaj lwm tus neeg uas tsis nrog yus nyob ib tsev, tshwj thaum yus nyob hauv yus lub tsev thiab nrog cov neeg uas nyob hauv yus ib tsev xwb.

Yog tias kuv nyob hauv chav ua haujlwm nrog kuv ib leeg hauv ib lub hoob uas muaj qhov rooj kuv puas yuav tsum tau hnav daim ntaub npog ntsej muag?
Cov neeg ua haujlwm tsuas yog yuav tsum tau hnav daim ntaub npog ntsej muag yog tias nyog sab hauv nrog lwm tus uas tsis nrog yus ib tsev nyob. Yog tias cov neeg ua haujlwm nyob hauv ib lub hoob uas tsis muaj leej twg nkag mus hauv qhov chaw ntawv ces tsis tas yuav hnav daim ntaub npog ntsej muag.

Kuv yuav hnav daim ntaub npog ntsej muag li cas thaum kuv noj mov lossis nyob hauv tsev lag luam noj mov?
Thaum koj noj mov, yeej pub koj hle koj daim ntaub npog ntsej muag thaum noj mov thiab haus dej. Tabsis koj yuav tsum hnav thaum tos koj cov zaub mov lossis thaum tos rooj zaum txhua lub sijhawm thaum nyob hauv tsev lag luam noj mov thaum koj tsis noj mov.

Kuv puas yuav tsum tau hnav daim ntaub npog ntsej muag thaum kuv nyob hauv tsheb tos cov khoom noj thiab siv kev pab cuam curbside?
Koj tsis tas yuav hnav daim ntaub npog ntsej muag, tab sis peb pom zoo koj hnav daim ntaub npog ntsej muag.

Puas yog cov neeg ua tsaug zog ntawm lawv qhov chaw ua haujlwm (piv txwv: EMS, neeg tua hluav taws, pab neeg mob) yuav tsum hnav daim ntaub npog ntsej muag thaum pw?
Tsis tas yuav hnav. Tabsis yuav tsum nyob deb lwm tus.

Kuv yuav ua li cas yog tias kuv pom ib tus neeg tsis hnav daim ntaub npog ntsej muag?
Koj tsis txhob ua dabtsi. Qee tus neeg muaj cov xwm txheej uas tsis zoo rau lawv yog tias lawv hnav daim ntaub npog ntsej muag. Tsuas yog koj hnav koj daim ntaub npog ntsej muag ces zoo lawm.

 

Cov Menyuam, Chaw Zov Menyuam, thiab Tsev Kawm Ntawv

Kuv yuav cob qhia kuv tus menyuam kom hnav daim ntaub npog ntsej muag li cas?
Txoj cai tswj npog ntsej muag yog rau cov menyuam yaus hnub nyoog tsib xyoos thiab laus dua xwb, thiab peb nkag siab tias qhov no yog ib qhov yuav nyuaj heev. Qhov zoo thaum qhia menyuam yuas ua ib txoj haujlwm, yus yuavtusm piav qhia kom zoo rau lawv vim li cas lawv yuavtsum hnav daim ntaub npog ntsej muag. Thiab piav qhia lawv tias kev hnav daim ntaub npog ntsej muag yog ib qhov uas zoo tiv thaiv lawv tsis txhob ua rau lwm tus neeg mob. Nws kuj pab yog tias koj piav rau lawv cov lus qhia tias yog lawv hnav daim ntaub npog ntsej muag yuav pab rau cov neeg nyob ze lawv, ib yam li lawv pog thiab yawg lossis niam thiab txiv. Txawm hais tias lawv pog thiab yawg yuav nyob hauv lwm lub xeev los, yog koj piav qhia tias cov neeg uas lawv ntsib tis tab laj, khw muag khoom lossis tsev kho mob yog lwm tus neeg yawg thiab pog, thiab peb xav kom cov pog thiab yawg no nyob nyab xeeb lawv thiaj tau nrog lawv cov menyuam xeeb ntxwv nyob ntev. Peb pom zoo li cov lus qhia ntxiv los ntawm KidsHealth thiab Childrens 'Minnesota.

Puas yog kuv tus menyuam yuav tsum tau hnav daim ntaub npog ntsej muag thaum nyob hauv tsheb npav?
Yog lawm, menyuam yaus hnub nyoog tsib xyoos thiab tshaj saud yuav tsum tau hnav daim ntaub npog ntsej muag thaum caij tsheb npav lossis caij npav, caij tsheb ntiav, tsheb ntiav tus kheej, tsheb sib koom caij, lossis lwm yam rau kev ntiav tsheb.

Puas yog kuv tus menyuam yuav tsum tau hnav daim ntaub npog ntsej muag thaum nyob hauv qhov chaw zov menyuam?
Yuav tsum hnav daim ntaub npog ntsej muag rau cov menyuam yaus hnub nyoog tsib xyoos thiab laus dua. Cov menyuam yaus hnub nyoog qis dua ob xyoos yuav tsum tsis txhob hnav daim ntaub npog ntsej muag vim yuav ua rau lawv ua tsis taus pa. Cov menyuam yaus uas muaj hnub nyoog ob, peb lossis plaub xyoos, nrog kev pab thiab saib xyuas ntawm tus neeg laus, pom zoo kom lawv hnav daim ntaub npog ntsej muag txhua lub sijhawm thaum nws nyuaj rau kev tswj kom lawv nyob deb lwm tus.

Puas yog menyuam yaus yuav tsum hnav daim ntaub npog ntsej muag thaum sijhawm pw?
Lawv tsis tas yuav hnav thaum sijhawm pw. Tabsis yuav tsum tswj kom lawv nyob nrug deb lwm tus.

Kuv puas muaj cai xee ib daim ntawv zam kom kuv tus menyuam tsis tas yuav hnav daim ntaub npog ntsej muag ntawm lawv qhov chaw zov menyuam lossis tsev kawm ntawv?
Txaws yog tias koj kos npe rau ib daim ntawv zam koj tus menyuam los koj tsis muaj cai vim txoj cai no yog los ntawm Cheeb Tsam Dane. Muaj kev zam tshwj xeeb yog rau cov tib neeg uas muaj mob, mob hlwb, lossis xiam oob qhab uas tsis zoo rau lawv yog lawv hnav daim ntaub npog ntsej muag.

Yuav ua li cas yog hais tias lub chaw zov menyuam lossis lub tsev kawm ntawv muaj chav kawm nrog cov hnub nyoog sib xyaw uake?
Txhua tus uas muaj hnub nyoog tsib xyoos thiab laus dua yuav tsum hnav daim ntaub npog ntsej muag. Cov menyuam yaus uas muaj hnub nyoog ob, peb lossis plaub xyoos, nrog kev pab thiab saib xyuas ntawm tus neeg laus, thiab peb pom zoo kom yuavtsum hnav daim npog ntsej muag txhua lub sijhawm thaum nws nyuaj rau kev tswj kom nyob deb lwm tus. Nyob ntawm koj lub chaw zov menyuam yog tias lawv xav kom menyuam yaus hnub nyoog tshaj ob xyoos hnav hnav daim ntaub npog ntsej muag hauv chav kawm nrog cov hnub nyoog sib xyaw.

Kuv ua hauj lwm uas yog ib tug zov menyuam (nanny). Puas yog kuv yuav tsum tau hnav daim ntaub npog ntsej muag hauv tsev neeg uas kuv ua haujlwm rau?
Yog lawm, thaum twg koj nyob sab hauv tsev nrog cov tib neeg uas tsis nyob hauv koj ib tsev, koj yuav tsum hnav daim ntaub npog ntsej muag.